Stem: Cessez Mortels de Souspirer, &c.
LEght af u vreucht,
En staeckt gheneught,
Midts dat ons heden is benomen
Een waerde blom
Die Wellekom
Sal wesen daer zy nu zal komen,
Die oock haer aenghename Geest
Ons stadigh is een vreucht gheweest.
2 Ach! 't was te vroegh
Dat men haer droegh
Soo haest van hier int duyster aerde,
En liet in rouw
Een droeve Vrouw,
Die 't aenghename beelt eerst baerde,
Ja die oock was haer vaders vreucht,
En Broeders streckte tot geneught.
3 Ha Isabel
V Geest is wel
Van God ghetoghen, hier nae boven
Dan tijt noch stont
Sal uyt ons mont,
V deughden zijn, maer stadigh loven
En altijdt dencken soete Maeght,
Wat lof en eer ghy mede draeght.
Gode geeft hem rust ,, Die 't eeuwigh lust,
P. Coesaert