Lerinde Singht.Op de wyse: Droeve Princesse van 't woeste ghebieden.
HEmelsche Venus stort uwen seghen
Over dit saem vernoeghde Paer,
Dat gheen ramp-spoet noch druck hen bejegen,
Maer datse leven met malkaer,
In vree en rust en in een goet genoeghen,
En haer wille voegen al naer des hemels wil,
En om de kost met vreucht dagelijckx ploegen,
En myden het wroegen twist kyven en gheschil,
Tot dat de doot die 't alles hier wegh ruckt,
Hen eerelijck beyde ten grave druckt.
Verandert in tijts.
Car.
Dat Liedjen heb ick wel voor een jaer hooren singen
Ter plaetse daer ick was genoot ter Bruylofts-Feest.
Ros.
Ick ben daer oock geweest.
Nu Cloris wat sult ghy ons nieus te voorschijn bringhen.