Op de wijse: Sottekens keert u omme.
VErweckt ghy edel geesten,
Wilt nu vrolijck tieren,
Minste met de meesten,
Help ons den Mey vercieren,
En des vreughts banieren,
Wilt nu open doen,
En om den Mey te vieren,
So wilt u dapper spoen.
Alle ghy Venus scholieren,
Wilt herwaerts arrivieren,
Ende bly met manieren,
Wilt nu vreught hanteren,
Ende vrolijck domineren,
Met Venus Knechtkens soet,
Ende jeughdelijk vyoleren,
Maeckt nu een moet.
Alle die metter musijcken,
Wilt nu droefheyd vellen,
En alle Rethorijcken,
Wilt nu wat nieus op-stellen,
Want Mars en can ons niet quellen
Nu noch nimmermeer,
Want hy met zijnen Gesellen
Sijn nu in groot verseer.
Al door dees peys vol minnen,
Die ons nu is gegeven,
Sijn alle nijdighe zinnen
Oock van ons verdreven,
Dus wilt al sonder sneven
Altijd met zinnen wijs
God die ons zondt beneden
Lof geven ende prijs.
En die geneughte benyen,
Qualijck moetense varen,
En groote fantasyen
Moeten haer beswaren,
Ende verde van ons verhaeren,
Nu en tot aller tijt,
So moghen wy aliijd baren
Geneught, en oock jolijt.
Prince wilt u verblyen
Met den Mey int groene,
Want aen alle zyen
Staet zy in schoonen doene,
En dat wy groeyende uyt liefden coene
t'Vwer eeren hebben bestaen,
Dat wilt in elck saysoene
Danckelijck ontfaen.