Op de wijse: Ick had een gestadigh Minneken. KIest nu een Duyfken reene Van manieren seer eerbaer, Die ghy kust en mint alleene
Noyt liever echter paer, Kiest eerbaerheyt voor waer Voor rijckdom verheven, Schoonheyt wilt niet aenkleven Het is de tweede groet. En laet u niet bedrieghen Van Ionckvrouwen schoon van praet, Die u herte konnen nyghen Al om haer eyghen baet, 'tIs sulcken evel quaet Wie daer mede is bevanghen Die komt nu int verstranghen Als daer gheschreven staet. Sampson die stercke verheven Is bedroghen door vrouwen ras, Sy heeft hem den wijn te drincken gegeven Om te weten waer sijn sterckheyt was, Als sy hadde vernomen das Heeft sy sijn hayr afghesneden, Waerom hem over winnen deden Sijn vyanden op dat pas. Salomon de alderwijste op aerden Is oock verleydet seer, Die andere lieden leerden Quam tot afgoderije weer, 'tWelck al die vrouwen deen, Dus wilt u daer voor wachten Want de wijn, liefde en nachten Blust in de Iongers het vyer. Kiest een Lief soet van manieren Die daer vroom deughdelijck is, Haer huys weet te regieren, Van vrome Ouders ghewis, Sy is ghelijck een wijnstock fris, Daer ghy in vree me meught leven, God de Heere sal u genoegh geven Dat u niet ghebrekende is. Wilt met haer converseren Eerst een korte wijl en tijt, Aensiet haer zeden en manieren Beproeftse wel en door siet, Op dat ghy niet en komt int verdriet, Want na bedacht doet menich klaghen, Dus wel versint eer ghy behaghen Aen haer krijght met liefde heet. Princen dit Liedeken is ghedichtet
Van een heusche jonghelinck waert, Die niet wel was gestichtet Ghelijck veel is der Ionghers aert Int vrijen het sy verclaert Daer om hy hem vant bedrogen, Dus buyghet alleyn u ooghen Nae een Ionckvrou eerbaer.
Cookies on Poetry Cove