Op de wijse: Vande Lommerdemy.
LAestmael al met blijde sinnen
Quam ick door dat groene Wout,
Daer vant ick Venus die Godinne
Met haer gheselschap jonck en out,
Elck brocht haer vreuchde voort
Want sy songhen met accoort,
Comt gesellekens vry by my
Met u liefken in dat groene,
Weset vrolick ende bly
Hier by ons in dit saysoene,
Maeckt jolijt // tot dese tijdt
Tot yder spijt, diet benijt.
Venus en Diana schoone
Waren oock in dit rogier,
Cupido sat inden Throone,
Iupiter wast hooghste bestier,
Doen sanck daer een Basuyne claer
Luyde dat was immer waer
Comt ghesellekens vry by my, Met etc.
Doen ginck Venus onverholen
Lustigh op hanghen eenen Crans,
Ghemaeckt met roosen en Fiolen
Daer vergaert was eenen dans,
Doen sanck daer een voys en troys
Met also soete voys
Comt ghesellekens vry by my, Met etc.
Doen wy saten lustigh en songhen
Vreuchde bedreven delicaet
Discordia quam daer in ghesprongen
Seer vermummelt ende quaet,
Maer haren raet wert niet geacht
Want wy songhen met grooter macht
Comt gesellekens vry by my, Met etc.
'Twas daer seer lustich om te blijven
Peynse ick edel Prince jent,
Mocht ick mijns selfs gherijven
Mijn liefken spreken present
Terwijlen ick stont in dit gepeys
Sangh Cupido noch een reys
Comt gesellekens vry by my, Met etc.