Op de wijse: Pour mon playsier.
SChoon lief ghy zijt mijn troost alleyne
Verkoren boven al, verkoren, &c.
Ghy spijst ziel en lijf int ghemeyne
Hier in dit aertsche dal, hier in dit, &c.
Des nijders geschal, met haer boose treken,
Sy beletten my mijn lief te spreken, sy, &c.
't Welck ick my wel beklaghen sal.
Schoon Lief wat sout my moghen baten
Ter werelt menigh pont, Ter, &c.
En ick u dan sou moeten laten
Soo waer ick gantsch doorwont, so, &c.
In mijns liefs rooder mont
Is noyt bedrogh ghevonden
Dat mach ick liefken wel oorconden, &c.
Alst u belieft maeckt my ghesont.
Schriftuere lief is uwen name
Al wort ghy seer benijt, al, &c.
t' Onrecht sou ick my moghen schamen,
Want ghy die liefste zijt, want, &c.
En sonder u jolijt,
Wat sal ick beginnen
Helpt my schoon lief de strijt ghewinnen
In dese minne strijdt.
Schoon lief ghy had my uytverkoren
Al eer ick u verkoos, al, &c.
Ghy socht my daer ick was verloren
Daer ick lach troosteloos, daer ick, &c.
Alle mijn wonden boos
Hebt ghy gheheel genesen
Met Wijn en Olie ghepresen
Dies ick u Lief voor een ander verkoos.