Op de wijse: Alst begint. MEn leest in Esdras vanden Wijn, Ende vanden Coninck fijn, Maer dat de vrouwen vroomer zijn Ende excelenter beseven, Zij verblijt den man door haren aenschijn Ende sy brenght uyt ghepijn Verstaet die woorden mijn, Een vrou is boven al verheven, Eene wijse vrouwe goet, Verheucht haer Mans ghemoet, Haer woorden devijne Sy zijn den man een medecijne. Wie soude niet prijsen der vrouwen aert Des morghens vroech verclaert En heeft oock geen goet aert, Zy doet dat huys geheel verlichten, De vrou al met den man ghepaert Het Huwelick wel vergaert Latet u oock zijn verclaert, Al moet sy onderdanich den man zwichten Vresen ende wederbaer, Een goede vrou voorwaer Is van God ghegheven In onder danicheyt te leven. Int beginne schiep Godt den man voorwaer Al vander Aerde zwaer, Ende die vrou daer naer Al van des mans Beenen Wt zijnder zijde een Ribbe claer, Bewijsende een paer Den Man in vrede met haer Te woonen, ende te vercleenen
Maer beminnen als zijn eyghen lijf Sonder eenich gekijf, In liefde puere Ghelijck zijn Vleys en zijn natuere. Al eerbaer vrouwen wy prijsen dan, Wel geluckich is de Man Die sulcken vrouken crijghen can Die leeft inde vreese des Heeren, Het Huwelijck is soo lieffelijcken gespan En schept u daer niet van Maer hout u vrolick daer an Oft ghy comt in groot jammer en verseren, Ghy Mannen al ghemeyn Bemint u vrouwen reyn U vlees en u ghebeente Ghelijck Christus doet zijn ghemeente. Prince en veracht geen vrouwen wijs Maer geeftse eer en prijs, In eerbaerheyt en jolijs Want sy gaen boven sijn Gouwe, De gratie haerder eerbaerheyt propijs Is als een ghebloeyt rijs, Nae der Schrift advijs Sy is ghelijck des Hemels douwe, Een vergulden crans, een glory des mans Wilt by haer blijven, Sonder vrouwen cont ghy niet bedrijven.
Cookies on Poetry Cove