Op de wijse: Ick klaegh u Venus dieren.
CVpidoos felligh schieten
Heeft mijn jongh hert geschent,
Mach ick geen hulp genieten
Van u Maeghdeken jent
Soo blijf ick in torment,
En sal noch moeten treuren
Tot dat mijn leven ent,
Dus laet my troost ghebeuren.
Nae troost staet mijn verlanghen
Reyn suyver jonghe jeught,
Wilt u dienaer ontfanghen
Op eer en oock op deught,
Soo sal worden verheught
Mijn hert en oock mijn sinnen,
En al met reyn gheneught
V altijdt stadigh minnen.
Mint die u heeft verkoren
Boven die leven schoon,
Wilt mijn liefd' niet versmoren
Al ben ick een persoon
Niet waerdigh sulcken loon,
Nochtans hoop ick met vresen
Ghy die daer spant de kroon,
Dat ghy sult ghenesen.
Gheneest ghy my seer spoedigh
Door d'amoreusheyt soet
Die ghy hebt overvloedigh,
Soo sal ick met ootmoet
V minnen als mijn bloet,
En oock voortaen gaen houwen
Al voor mijn waerste goet,
Dus wilt doch op my bouwen.
Oorlof Princes verheven
Daer al mijn troost aen staet,
Ick sal u niet begeven
Soo ghy my niet verlaet,
Maer door u soete praet
Soo sal mijn herte groeyen
In liefde delicaet,
Dus wilt oock in liefd' bloeyen.