Op de wijse: Al ghy Venus dierkens.
OM nu te moghen uyten
Dat ick heb aengheheven
Dat ons die wijngaert spruyten
Seer mildelijck gheven
Daer wy vrolijck by leven
't Verheucht ons sinnen wel
Ick salt u liefken gheven
Tot voldoeningh van't spel.
Als ghy lief hebt ontfanghen
Volcht my als ick doe vooren
Voldoet ons met sanghe
Laet u clincker nu hooren
Om vreuchde te oorbooren
Alle treuren versmaet,
Hebt ghy wat selfs vercooren
Hem nimmermeer verlaet.
'tGelt u mijn nabuerinne
Hier in desen contreye
'tGaet seer soetelijck inne
'tSmaeckt als een suyckereije
Als ick dit natken spreye
'tVerheucht alle mijn moet
Singt oock een Lietjen fraeye
Als uwen schencker doet.
Princes dits u gheschoncken
En u jonstigher Heeren
'tTis schoontkens uyt ghedroncken,
Doet mee tis mijn begeeren
Wilt my ten besten keeren
Het comt uyt 'shertsen gront
Lief dits tot uwer eeren
Voor uwer rooder mont.