Op de wijse: Fortuyn eylaes bedroeft.
AEnsiet u dienaers staet, Schoon bloemken excellent, Peynst eens hoe't met hem gaet Die van u is absent, Wiens hertelijck groot torment, &c. Om u schoon suyver greyn, &c. Tot u liefste jent Staet mijn toevlucht alleyn. Tot u bloem expaert Staet alle mijn begeer, Reyn deughtsaem van aert Sijt ghy vol alder eer, Mijn bede doch aenhoort, &c. Niemant dan Godt voorwaer, &c. Can mijn gheven confoort, Dus vertroost u dienaer. Ben ick schoon lief van hier Soo vergeet u dienaer niet, Of ghy brenght in dangier Mijn hert, in swaer verdriet Ghestadigh en ghetrou, &c. Want ghy zijt mijn lief alleen, &c. O suyver karsou Daer alle mijn troost op staet. Ick peynsde dach en nacht Om u bloemken fier, Den tijt met smert verwacht In lijden en dangier, Dat ick o Venus dier, &c. Met u lief in eendracht, &c. Wt blusse Venus vier Al door der minnen cracht. Ick ben nu absent Van u o suyver jeught, Nochtans mijn hert present Om u dick verheught, Ghedenckt schoon lief aen my, &c. Want mijn hert dat blaeckt, &c. Na u uyt liefden vry, 't Welck door u blijschap smaeckt. Getrou tot inden doot Blijf ick u lief altijt, Mijn hert in pijne groot Om u hem dick verblijt, Want ghy zijt mijn lief alleen, &c. Mijn troost tot aller stont, &c.
Lief ghy ende anders geen Hebt mijn hert doorwont. Reyn violieren soet, Reyn maeghdelijck pylaer, Comt toont my doch ootmoet, En vertroost u dienaer, Laet my eens troost ontfaen, &c. En wilt in mijn absent, &c. My uwen gunst voortaen Toe dragen tot den ent. Edel Princes vol deught Ick beveel u den Heer, Ick blijf lief onverheught Tot dat ick weder keer Tot mijns hertsen croon, &c. Schoon liefken triumphant, &c. Nae u mijn liefste schoon Mijn jonck hert stadigh brant.
Cookies on Poetry Cove