Op de wijse: Als de Heer verkeeren wou.
SVllen wy aldus stille staen
Dat kan geen vreught voort bringhen,
Hey laet ons altijt omme gaen
Al sal't niet konstigh zijn ghedaen
Nochtans sal ick voor singhen.
Een Meysken dat seer soetjens singht
Hout mijn jonck hert bevanghen,
Mijn hert van vreughde my ontspringht
Als sy my eens lieflijck toewinckt
Soo blijf ick haer ghevangen.
Sy lacht soo soet 't sal nu wel zijn
Sy sal mijn jammer blusschen,
Hey waerse hier de liefste mijn
Soo sou ick vrolijck haer aenschijn
Nae mijn behagen kussen.
Iae al die lieve langhe nacht
Sou ick gheneucht vermeeren,
En soenen haer wangskens sacht
Vreucht en solaes sou zijn verpacht
Nae haer en mijn begeeren.
Princes maeckt my eens verheught
Wilt u by u Lief paren,
Maer kiest voor gelt en schand' de deught
Soo suldy met u Prins in vreught
Door brenghen uwe jaren.