Op de wijse alst begint.
GHy mannen al // die in dit dal
Nu vreughde wilt bedrijven
Schout doch misval // groot ende smal
Wacht u van quaede wijven,
Want drinckt ghy u nu eens verheught
Soo heb ghy dan groot ongeneught
En meught int huys, int huys en meught int huys niet blijven.
De vrouwen quaet, seer obstinaet
Soecken geen droncken Mannen,
Maer vroegh en laet, is al haer praet
Om aen den ploegh te spannen,
Soo wie hem daer toe niet en vlijt
Die heeft van haer veel twist en strijt,
Ia hiet den bloet, den bloet, den bloet, ja hiet den bloet noch hannen.
Menigh slecht bloet , is dick wel goet
Al gaet hy somtijts poyen,
Maer 't Wijf verwoet, slaet hem met spoet
En soeckt hem 't hooft te vloyen,
Ia dickwils krijcht hy wel een schop
En moet oock somtijts blasen op
Ick heb gheen sin, geen sin, gheen sin, ick heb geen sin int hopen.
Princen nu tracht, altijt met macht
Om u Wijf te behaghen,
Maeckt datse lacht, en vreught verpacht
Soo hoeftse niet te klaghen,
Maeckt oock dat ghy haer huys versiet
Soo sal sy buyten leenen niet,
Biet elck een soen, een soen, een soen, biet elck een soen by vlaghen.