Op de wijse: Iubileert ghy Venus Tonghen. QVa Clappers Tonghen fenijne Die brenghen my in haet altijd, Van de liefste Goddinne mijne, Die ick bemin boven des Werelts crijd. Sal die solaes lange duren Soo wilde dat ick waer een wilde Swaen, Och my kan geen troost gebeuren, Want ghy hebt liever een ander Man. Liefde ende gelt hebben een krijgh ghestadich Alsomen nu voor ooghen siet, O liefken zijt u dienaer ghenadich Bemint schoonheyt voor rijckdom wreet. Liefde heeft alle dinck verwonnen Ghelijckmen dat ghemeynlijck seyt Maer 't gelt heeft d'overhant begonnen Te crijghen met grooter hertsen leyt. Wat baet rijckdom of aertsche goeden Als ghy gheen wille daer van en crijcht, Neemt uwen dienaer in u behoede Die u sal dienen in alle gherijf. Een huwelijck eens te aenvaerden En is (verstaet my) geen cleyne saeck Want daer is gheen beter dinck op aerden Dan die een goe gaeye gheraeckt. Daermen zijn leven by sal eynden Het is wel over te dencken weert, Want men comt so dickwils in ellende Die so reuckeloos een quaet hylick aenveert. Oft ghy nu kreecht een rijck Persoon Daer ghy niet me in vreden leven meucht Zult ghy niet crijgen nae u wercken loon Overpeynst selfs na uws hertsen geneucht. Ick heb drie of vier jaren ghelijck Na u ghestaen in aller eer, Sal ick nu noch ten laesten van u wijcken Mijn herte sal my toe breken seer. Mocht ick als Galmi den Ridder coene Voor u campen teghen eenich Helt En mocht u ghewinnen met een Lancy ydoone, Mijn lijf en leven sou voor u zijn ghestelt. Ende so ic dan geen troost mocht verwerven
So soude ick als Piramus onvroet My doorsteken, en also den doot sterven En storten voor u mijn roode bloet.
Cookies on Poetry Cove