Op de wijse: Wilhelmus van, &c.
MEt gantscher droever herten
Klaegh ick mijn lijden groot,
Ick ly droefheyt en smerten
Van rouwe blijf ick doot,
Om dat ghy Lief ghepresen
V ooghen van my went,
Ghy die my kont ghenesen
Moet van u zijn absent.
Wy plagen met vreught lustigh
Als Venus kinderen doen
Ons tijdt te quisten rustigh
Buyten al in dat groen,
Daer ginghen wy vermeyen
Als Liefkens hant aen hant,
Ick dacht geensins te scheyen
Van u reyn fleur playsant.
d' Oorsaeck kan ick niet weten
Waerom dat dit gheschiet,
Ick pleegh u Lief te heeten,
En nu acht ghy my niet,
Dan het sal eens omkeeren
Al doet ghy my ontrou,
Want men vint meer met eeren
Dan u schoone Kerssou.
Adieu Princesse schoone
Die my lijden aendoet,
Ick acht u niet een boone
Als het dus wesen moet,
Wilt voort u begeert blussen
Met hem die my besint,
Ick sal mijn lief eens kussen
Die my meerder bemint.