Op de wijse: Komt al ghy Venus dierkens.
SChoon Lief aenhoort mijn kermen
Verandert eens van sinnen,
Wilt u doch eens ontfermen
Op dat ick troost mach winnen
Gheen ander sal ick minnen
dat u schoon Lief eerbaer,
Dus laet ick u ghewinnen
In desen nieuwen Iaer.
Als Helena seer aerdigh
Zijt ghy verciert met deughden,
Dus zijt ghy wel prijs waerdigh
Reyn bloemken vol van vreughden
Laet ons doch jonghe jeughden
Vergaren tot een paer
Want my dan wel gheneughden
In desen nieuwen Iaer.
Sal ick noch langher derven
Schoon Lief u minnelijck wesen
So sal ick moeten sterven, En nimmermeer genesen,
Dus bid ick Lief ghepresen
Ontfanght uwen Dienaer,
Soo hoef ick niet te vresen
In desen nieuwen Iaer.
Deughtsame schoone Vrouwe,
Princes waert om laudeeren,
Weest u Dienaer ghetrouwe
Soo mach mijn vreught vermeeren,
Anders sal ick verteeren
Mijn hert in lijden swaer
Schoon Lief wilt u verneeren
Tot my int nieuwe Iaer.