Op de wijse: Hout aen ghy Venus dierkens.
O Godt al van der minnen,
Seer krachtich van kueren
Ghy berooft mijn hert en sinnen
Nu en tot aller uren,
Aenhoort doch mijn labeuren
Of ick blijf al int verdriet,
Ick legh in swaer doleuren
Want my onrecht gheschiet.
Aylacy al mijn leven
Is niet dan eenigh sterven
Vreughde wort nu bedreven
Alle solaes moet ick derven,
Want sy wilt my onterven
Die mijn herte soo doorspiet,
Hoe soudt ick vreught verwerven
Want my onrecht gheschiet.
Ick en kan van haer niet weten
Die rechte oorsaecken
Dat sy my heeft vergheten,
Die mijn herteken doet blaken
Maer doen wy lestmael spraken
Dat docht ick eylacy niet
Dat my dit soude ghenieten
Want my onrecht gheschiet.
Hoe soude ick connen bedrijven
Vreught oft eenighe melody,
Want de fleur der Wijven
Valt my nu heel party,
Druck en fantasy
Benaut mijn herte siet,
Gheen meerder vileny
Want my onrecht geschiet.
Daer ick eylacy mijn leven
Voor soude waghen,
Die heeft my begheven
In eens anders behaghen,
Nu en tot allen daghen
Die sy haer vrientschap biet,
Ick mach my wel beclaghen
Want my onrecht geschiet.
Oorlof Princesse
Neem ick by desen
Mijn Amatoresse
Alst niet anders mach wesen
Ick waer genesen
Dat ghy u straffe hart liet
Adieu reyn bloemken uytgelesen
Want my onrecht gheschiet.