Op de wijse: Ick wou dat ick waer een wilde Swaen.
FOrtuyn dat liep my teghen siet,
Waer door ick quam in groot verdriet
Doort trouwen van een Wijf,
Sal dit eylacy deuren altijt
Soo ben ick een arm Katijf.
Gelt en goet socht ick seer
Niet aensiende een Persoon van eer
Waerom ick bedroghen was,
Dus raed ick alle Vrijers hier
Te Vrijen haers ghelijck op dat pas.
Reyst niet in landen onbekent,
Om te Vrijen een Persoon absent
Want ghy haer zeden niet en weet
Noch haer gheslachte pertinent
Waerom ghy dickwils sneeft.
Die wijse-man leert zijn Soone wel,
Dat hy sal Vrijen byder handt snel
Waer hy daghelijcx mee om gaet,
Op Israel seer obstinaet.
Doen Israel vreemde Wijven nam
Worde God soo seer gram
Waerom sy worden gestraft seer,
Ghy vrysters neemt hier exempel aen
Op dat ghy niet en comt in oneer.
Daer is op aerden geen quader beest
Als een boos Wijf onbevreest,
Sy doet den Man dolen altijt,
Als den Man niet in vreden leeft
Soo gaet hy drincken en dobbelen sonder respijt.
Een deuchtsaeme Wijf eerbaer
Kan een man stieren te rechte daer
Om te leven in goedt accoort,
Godt te vreesen en te dienen voorwaer
Als nae des Heeren woort.
Prince jonge scholieren delicaet
Om gelt en goet doch niet aenslaet
Een houwelijck van een quaet Wijf,
Ghy comt daer door in tribulacy quaet
Ende in soo boosen gherijf.