Op de wijse: Wilt nu al, groot en smal. SChept jolijt, wie ghy zijt Want de boomen bloeyen, Vele Bloemkens groeyen Tot lust al hier int lant Door desen Mey playsant, Wy zijn quijt, wie het spijt 'sWinters harde boeyen Die daer socht te snoeyen Ons vreughde triumphant Soo menigh is bekant, Dus wilt vermeeren, het jubileren Der Vogels stemmen // dan
Want sy begeeren, dees tijdt te eeren Niemant haer temmen // kan, Daerom spoort, met accoort Haer lof te belijen, Want ghy hoort, rechte voort Datse niet gaet mijen, ons te verblijen Aen allen zijen. Groote vreught, reyn geneught Sietmen nu ontfouwen, Want men mach aenschouwen Door dese Mey seer jent Veel Goden hier present, Venus jeught, nu verheught Ionghen ende ouwen, Cupidoos ontfouwen Werckt liefde excellent, En maeckt menigh verblent, Daerom wilt trachten, druck te versachten En jonst oorboren // goet, Neptunus krachten, wilt doch niet achten Want hy versmoren // moet Door de kroon, die ydoon Aurora gaet draghen, Phebus schoon, geeft nu loon Na ons behagen, om wegh te jagen Het druckigh klagen. In het groen sietmen spoen Minnaers sonder vresen Met haer Liefkens wesen, Te thoonen onbeswaert Reyn liefde soet van aert, Oock seer koen, sietmen voen Kusjens uyt ghelesen, 't Loer-oogen ghepresen Wort daer oock niet ghespaert, Waer deur trou wort verklaert, Oock hoortmen uyten, lieflijck fluyten Door Rethorijckse konst, Fiolen, Fluyten, Harpen en Luyten Door de Musijckse gonst, Menigh paer, sietmen daer Lustigh omme springhen, Geen beswaer, schijnt aen haer Die dit lof voort bringhen, Want sy bedingen, wilt vrolijck singen. Prince stelt u int velt
Om te gaen vermaecken Want daer meught ghy smaecken De kracht die nu spruyt reyn Wt veel kruyden ghemeyn, 'tWort ghemelt en vertelt Dat veel bloemkens naken Die wy niet versaken, Als Goutbloemkens certeyn Die daer groeyen int pleyn Geel Violetten, wilt niet verpletten Noch Acoleyen wit, Rooskens wilt netten, Lelykens setten 'tLof doet verbreyen dit. d'Eglentier, sietmen hier In schoonheyt verrijcken, Haer playsier, verheught schier, Elck in alle wijcken, Door haer practijcken Gaet Momus strijcken.
Cookies on Poetry Cove