Op de wijse: O debonnaire Iesv!
1. OCh! daer en is in desen stal
Niet-met-al;
Onder dit kleyn dack
Is gheen ghemack. Och daer.
Iesvs light hier
Sonder vyer,
In den windt,
Ghelijck een kindt,
Vol van druck,
En vol van ongheluck.
Siet, hy light daer op het stroy,
En hy is ghedeckt met hoy;
Is dit voor een Coninghs kindt niet moy? Siet.
2. Een-ieghelijck die gaet ter sy,
Oft voor-by,
Daer is gheen besoeck
In desen hoeck;
Noch aen de deur
Staet Monsieur,
Noch Me-vrouw,
Sy vreest de kouw:
Daer is hier
Noch Maert, noch Camenier.
Ioseph die gaet op en neer,
Ioseph die gaet wegh en weer,
Ioseph dient den nieuw-gheboren Heer. Ioseph.
3. Ick sagh daer maer wat Herders by,
Twee of dry,
En besijden stondt
Den Herders hondt;
D'een die brocht aen
Melck en saen,
D'ander quam
Met een wit lam,
'T derde schonck
Het Kindt een duyve-jonck.
En doen namen sy hun fluyt,
Maeckten t'samen soet gheluyt,
Daer mé ghinghen sy den stal weer uyt. En doen.