Sin, en be-diedsel van het Beeldt. MAer siel wat droefheydt vind ick hier! Is dit den lust-hof van plaisier? Daer roosen, en den eglentier, Daer roos-marijn wast, en laurier, Daer de citroenen staen gheplant Daer de granaet-boom staet en brandt? My dunckt veel eer dat hier ontrent Is de spelonck van t'hels serpent. Och iaet, ick sie dat daer al hanght En met bedrogh den appel langht. O Eva, Eva sijt doch wijs! Ghewis het kost u t'paradijs, Daer toe noch onse salicheyt, Soo breet wordt dit fenijn ghespreyt! Eylaes den appel is ghepluckt! De tanden sijn daer in ghedruckt! En gheeft het stuck aen haeren Man, Die eet daer even gulsich van, VVaer door, en sy en heel t'gheslacht Is van t' gheluck in druck ghebracht; En van het leven in een doodt, Die strax voor ons den hemel sloot, En die gonck stoken voor ons al
Een vier dat eeuwich branden sal. Maer gy o Iesu Mensch, en Godt, Hebt d'overtreders van t' gebodt Door louter berremherticheyt Herstelt in hunne saelicheyt, Dies komt gy inden Hof gegaen Voor dat was in den hof misdaen. Maer wat een pers lijdt u gemoet Dat sy soo waeter sweet, en Bloedt! Ist om den kelck die voor u staet Vervult eylaes met mijn misdaet? Och dat ick noyt geboren waer! Soo viel het sterven u niet swaer. Maer Iesu, Iesu t'is my leet Dat ghy om my dit bloedich sweet, Dat gy om my soo schudt, en beeft, Dat u het leven schier begeeft, Y drinckt eerst af dees bitterheydt! En levert my de soeticheydt. En soo ick noch wat bidden mach, Laet storten dese regen-slach Op mijn vervuylt, en sondich hert. Op dat het eens gesuyvert wert, Den minsten druppel die het vat Van sweet, of Bloedt, o dierbaer nat! Soo weet ick dat t'van stonden aen Sal groender als dit hofken staen. O! Siel die als den vijg-boom zijt.
Heel dor, en half vermaledijdt, Bidt Iesum dat hy u besproeyt, Op dat ghy heel in deuchden groeyt, Brenght hier u hert op staende voet, En waschet af in sweet, en Bloedt, Hier is blanquet, hier is roset, Hier maecktmen herten schoon, en net. Ghy weet wat in het u noch schuylt. En wat het heden noch vervuylt, En watter in een hoecken leyt, Dat noyt is inde bicht gheseyt, Oft ist gheseyt, t'is soo ghedaen, Dat, t'maer ten halven is verstaen: VVel aen dan eens met kloecken moet Al soudt u kosten sweet, en bloedt: Maeckt dat u hert ghesuyvert wort Als Iesus desen Reghen stort. Peyst dickwils op dit salich woort, En segghet oock aen d'ander voort:
Gheen Heer, gheen eer, gheen Excellenci Gaeter voor en goe Conscienci.
Cookies on Poetry Cove