Sin, en bediedtsel Van het Beeld. NV heb ick Iesu beter moedt Als ick u heel sie in u Bloedt; VVant naer soo vreede gheesselingh' Hop' ick ghewis veranderingh': Den vrijdom wordt u toe-ghestaen, En niemandt kan daer teghen gaen, Oock die op u ghebeten sijn, Die moeten buygen door dees pijn Iae sullen noch wel staen beschaemt, Om 't Recht al wat te seer ghepraemt. En soo Pilatus tot een paer V voor-houdt met den Moordenaer, Met Barrabas die met het bloedt Van borgherij noch sit besproedt: Dat ieder noch in t'hert ghevoelt, Soo is den moet terstont ghekoelt: VVant sulcke onghelijckicheyt Steckt af door u onnooselheyt. Ah wat dat ick mijn selven streel! Sy roepen al met luyder keel', Dat Barrabas is weder vrient, Dat Iesus heeft de doot verdient, Dat Barrabas is los, en vry (O goddeloose raserny)
Dat Iesus naer soo vreede pijn Aent Cruys noch moet ghenaeghelt sijn; En dat hy hem noch heden al Met d'ander Moorders Cruycen sal: En hoet Pilatus weyndt, of keert, 't Ghepussel heeft hem overheert, En aen den President van t'landt Vringht het de roede wt de handt. O Siel ghy leest al anders heusch, Ghy sijs al wyser in den keus. Een Titel die u herte draeght, Doet blijck wie dat u meest behaeght: En hoe dat Iesus boven al V hert alleen besitten sal, Alleen. O dat is kloeck ghedaen! O dat is op de werelt staen! Dat is versaecken jeucht, en vreucht, En dat ons kittelt; en verheucht, En wat ons streelt, en wat ons vleyt, En wat ons inden dool-hof leyt. Als dan Bekooring' oirloogh voert, En teghen u de trommels roert, En u met kracht bestormen sal, Om u te trecken door den val, Om u te scheuren en met ghewelt, Van die ghy op u herte stelt; Schept moet, bid ick, in desen strydt, VVant Iesus ist die u bevrydt;
Daer Iesus light voor guarnisoen. VVie sal, wie kan daer teghen doen? Dies richt den standaert van het riet VVaer op den yder Iesum siet, VVaer op ghy Hooghe naemen voert. VVaer door ghy stijf, en onberoert, En hert sij teghen stael, en loot, Iae trotsen soudt de bleecke doot. Die maeckt dat ghy in alleen tijt Getrouw aen uwen Koninck sijt; En hem voor alle dingh' verkiest. En liever al, als hem verliest. Doch al is desen keus soo goet Siet wat dat meenich mensch al doet; Hoe veel en laeten Godt niet staen, En bidden gulde karvers aen. En t'hoochste goet daer al aen hanght, Daer schijnt dat t'minste aen belanght. Ah die voor Godt verkiest een beest! Dat is een beest in sijnen geest! Den eenen valt met sijn ghemoet Op ghelt, en onrechtveerdich goet, En schoon dit altijt knaeging geeft, Tis hem ghenoch als hy het heeft. Seght eens die naer sijn lusten jaeght Hoe weenich dier naer Iesum vraeght? Doch God die siet het speeltjen aen, En nemt den slach waer om te slaen.
En ghy die noch met vraeck-sucht gaet, En wordt ghehist door boosen raet; Gaet, en vergiet u s'vyandts bloet, V straf die volght op staende voet. Ghewis wie met de sweirden slaet, Dat die oock met het sweirt vergaet. De eer, een handt vol roock, en windt. Heeft oock al menich hert verblindt; Hoverdich mensch, O paeuws ghemoet! Ick bid siet eens op uwen voet En wie ghy waert, en noch kont sijn. O bobbel wat is uwen schijn? VVat seep-op, en een haever-strooy, Die maeckten u soo schoon, en mooy, En met een windeken dat waeyt Light ghy, en al u eer bekaeyt, Kiest liever eer die dueren sal, En daer gheen vrees is voor den val. Y! seght my eens o Liefde soet VVaer vindtmen soo bestandich goet? Y seght my eens of ick dit al In eenen Iesum vinden sal? Doch waerom twijffel ick daer van? VVant Iesus is alleen den man; On-eyndelijck in alle goet, Dat hy komt schencken met sijn Bloet. En sijnen wensch is dat voortaen Op t'hert sou Vive Iesus staen,
VVel aen o Siel in keus en strijt Seght Vive Iesus tallen tijt, Seght Vive Iesus over al, Als u de sond' bekoren sal, Seght Vive Iesus dach, en nacht Als u sal vleyen eer, en pracht; Seght Vive Iesus duysent keer En dat ghy dient maer eenen Heer.
Cookies on Poetry Cove