Dordrechts lijstertje

Stem: Och ongheluckighen dach,

HY die my t'clare licht Gont, dat mijn ooghs-gesicht Gheniet van veel schoonheden dicht, Heeft my ghetoont den dagh Dies ick wel roemen mach Dat ick noyt schoonder schoonheyt sach Dwelck was een eerbaer schoone Maeght Die alle schoonheyts croone draecht.

Hercules heete min Nam noyt soo haest begin Als ick door dese schoon Goddin, Recht daer ick by heur quam En icx heur eerst vernam Ontstack mijn hert door minnen vlam, En loop ick niet te breet // al wat? My docht se mijn niet leet // en hat.

Dochter goe meening' vry, Wort dit geseyt van my: Want al mijn lusten vreucht is sy: Maer can ick mercken wel Soo heeft Invidi fel Gesaeyt heur saet // bitter gequel, En soo sy dit te wenden // schort Soo sal mijn leven enden // cort.

Maer oft den wreeden haet V tot mijn nadeel raet, Vertrout daerom van my geen quaet, Let maer schoon lief altijt Op mijn ghestaghen vlijt, En daer door vast versekert zijt, Dat ick u sal Ionckvrou // vermaert Mijn leven zijn getrou // van aert.

En anders meen ick niet Soo ghy mijn liefd' aensiet, Dat my te recht van u geschiet, En of ghy waert daer heen Gheneycht om te besteen V strafheyt aen my, sonder reen, Soo sal ick met mijn bloet de weet V senden, lief, van mijn secreet.

Princesse die ick hiel, De ziele van mijn ziel, Waert dat mijn gonst u maer gheviel En oft u wiert ontraen, En ghy mijn ginght versmaen, Noch sal mijn gonst niet van u gaen: Want soo lang als mijn bloet // vermeert Blijft ghy die mijn gemoet // beheert.

Reyn liefd' betoont.