Stem: Swinters, Somers even groen, &c.
V Cupido placht ick te noemen,
Een God vol van verblijden soet:
Maer nu soud ick u schier verdoemen
Door pijn die ghy my lijden doet
Vwen schicht loodich doet mijn derven
Mijn lief, die liefde tegen hout
En my gaet ghy het hert doorkerven
Met eenen schicht brandigh van gout.
Smaelden ick op u swacke Leden
Als Phoebus eertijts heeft gedaen
Soo waer u doen niet tegen reden:
Maer oyt heb ick u voorgestaen,
En noch doet ghy my dees ontrouwe,
Of ist mijn schult, t'wort u gevraecht?
Heb ick te spade dees' jonck-vrouwe
Versocht en mijnen noot geclaecht.
T'sy u dan ghy Iokus valsch verradigh
Die my dit voordeel hebt belet
En ghy Arteros ongenadich,
Ghy doet my visschen achter t'net,
Men hoort u bey van hier te drijven,
Als wel verdient, in Plutoos dal:
Want ghy soeckt elck een te ontrijven:
Doch ick hoop dat u falen sal.
Wist Ick Invidia schoffierich,
Dat ghy oock schuldich waert int feyt
Haest soud' ick met reden manierich
Mijn onschult hebben aengeseyt:
Maer ick en kan't my niet versinnen,
Of soud' ick als Ikaris mee
Vliegen te hooch, en soo beginnen,
Te dalen weer tot inde Zee.
Oorlof Princesse reyn vol eeren,
Een klaech-gedicht is my dit liet
Na dien ick maer sonder vermeeren
T'water in open manden giet,
Als't God belieft, t'sijn u exkusen:
Maer weet dat die geen goet verbiet
Sonder begin (t'sijn maer Abusen)
En sietmen d'eynd'lijck wesen niet.