Stem: Courante Cerbande.
VEnus Godinne, wat lust maeckt u gereet, Te plagen my met uwen brant soo heet, Ey, God der minnen, soet vleyich ongekleet, Ghy schenckt my voor medoogen dubbel leet: Want ick noch kints heb u misschien Oock voor een kint maer aen gesien, Gekust met lust, u rooden mont Tot dat ghy my laes! hebt doorwont.
En al mijn gissen, was dat ghy dertel wicht, My staegh verblijden sout met u ghesicht: Maer 'tkan wel missen: want ghy u toont seer licht, Nu ghy my hebt doorwont met uwen schicht: Ick heb te vast op u vertrout: Maer ghy zijt, d'welck my uu wel rout, Ghevlucht, ick sucht te recht, Eylaes! V bly begin is droef gheraes.
In u af-wesen, hebt ghy my weer verweckt, Tot een, diens gunst schijnt tot my niet en streckt, En siet, door desen, soo vrees ick wel perfeckt, Dat mijn trou liefd' int endt mocht sijn begeckt, Ghy hebt Cupido vry ghesecht, Alsulcx wel eertijts aengherecht, Dat my nu vry, hoe wel niet sacht Al dickmael hout in mijn ghedacht.
Iason lichtvaerdigh die Media verliet Waer van hem al sijn welvaert was geschiet Paris onaerdich liet oock in groot verdriet: Zijn eerste lief die oenone hiet, En Theseus oock, wiens cloecke daet Gelockte door Ariadnes raet, Sijn trou, scheen sou, gantsch niet vergaen: Maer t'was eylaes! oock haest ghedaen.
Noch hondert ander, die ick met herten droef Wel noemen sou: maer doch ick niet en hoef, Met den Salmander, doen ick een heete proef Hoe meerder vlam, noch meerder ick vertoef Tot dat my t'bloet geheel verdort En Atropos my 'tleven kort, Ten waer my na der Goden vont Yet anders te verwachten stont.
Om dit te weten, O Hemel-Goden wilt My doch beraden, dat dees droefheyt stilt, Wilt niet vergeten bid ick u Pallas milt My te versien met uwen helm en schilt, Op dat door matigh wederstant Cupidos schicht en Venus brant Gheblust in rust ick leven mach Vaa nu voort met lijtsaem verdrach.
Cookies on Poetry Cove