Nae de stem: La volagie.
C. BAertje, mijn vriendinne, Ist altijts even druck, En scheyer nu noch niet haest uyt? B. Claertje, al ons winne Is niet by jou geluck: Want ick hoor jy bent de Bruyt: C. Wie docht // of brocht
Iou sulcke beuselingh an d'oor As ick hier hoor? Neen kint, waer daer wat an Iy wister 'teerste van.
B. Nochtans al een beetje Sey my een nu noch lest, Laet sien, wie wast? nu weet ick, ja, Trijn Ians, Moer seyse, weetje Ons Claertje, vrijt heur best Met Ioris, en 'tis vry wat na, C. Die vent // ick kent, Hy quam tot onsent even staech, Schier alle daech, Neen Moer, te veer van kant, 'Tis wel een ander quant.
B. Soo dan, dat's mijn segghen, 'T is noch niet al heel mis, Daer was wat an, dat wist ick wel: C. Ick kan't jou niet ontleggen, Hoe wel't noch niet en is: Maer ick meen dat' wesen sal: B. Daer sla // nu dra Geluck toe: want voorseker Meyt, Al hier geseyt, Waert met my oock soo veer, Ick wenschten schier niet meer.
C. Ick wil dat bekenne, 'Khebt nu drie jaer ghehart, Dat ick op mijn selven waer, Soo stil 'kant niet wennen, En waer toe langh ghemart?
Ick ben nu eenentwintigh jaer: B. Biloo // 'tis soo, En ick sal nu (bey, laet me sien) Maer seventien Eerst tegen Paesschen zijn, En 'twachten valt my pijn.
C. Iou scheuck, dat's oubolligh: Sou jijt alree bestaen? Wel jy bint een Liefje, Moer B. Ick kreuck niet, hoe drolligh Dat dit jou dunckt te gaen: Ick hiel soo lief als jy de sloer, C. Wel nou // met jou, En met jou lieve Vryer Brecht, Die moye knecht: Waer toe soo lang beraet,
Dat dat niet voort en gaet?
B. Hoort hier, watte kueren, Ey moer, jy weet wel bet, Stont het aen my 'twaer haest gedaen: 'Kmach schier nergens dueren, Soot mijn Oom langh belet, Ick meen met Brechten deur te gaen: C. Ey neen // ick meen Dat jy dat nimmermeer bestaet: Want Vrienden raet En moet niet sijn veracht, 'Twaer beter wat gewacht.
B. Dat's moy wel gesproken, My dunckt Speul-meyt jy raest, Hy wacht licht die nergens na haeckt,
C. Maer 'thoy, recht ghesproken En toonden noyt gheen haest Voor diet tot voer of beddingh maeckt, B. Dat's vast // soo wast, Had ick als jy oock mijnen wil, Ick sweech al stil: Maer mijn benieude lust Wort jou misschien gheblust.
Reyn liefd' betoont.
Cookies on Poetry Cove