Stem: Schoon jonck vrou ick moet u, &c.
LEstmael ginck ick my vermeyen
Om verfraeyen wat
Haest sach ick in de Valeye
Eenen fraeyen pat
Daer langs sach ick comen treden
In dat groen playsant
Veel Nimphen seer jent van leden,
En al hant, aen hant
Elck ginck daer sijn hooft vercieren
Met een lauwer-krans
Doen maeckten sy met manieren
Eenen ronden dans
En songen wilt vreucht hanteren:
Want tis Venus raet
En oock Cupidoos begeren
Oft Schoon Iuno haet.
Een klaer spruytende fonteyne
Daer beneven stont
Daer ick t'soetste wesen reyne
Van een maget vont.
Mijn hart vant ick strack besloten
Vol van liefden dicht,
T vlugge wicht heeft my door-schoten
Met der liefden schicht
Heel verlieft liet ick my dincken
Dat heur gonst ontstack.
Dies liet ick mijn vreese sincken
Dat ick heur aen sprack:
Maer doen ick my presenteerden
Te zijn heur dienaer,
Vont ick laes! dat sy my weerden,
Dies ick faelden daer.